ياشيخ انا ابلغ من العمر 19 عاما ومشكلتي هي مع والدتي دائما تفهمني خطأ وتفسر كل مااقوله على حسب مزاجها مثلا لو طلبت مني طلب وقلت طيب طيب هي تقول يعني كيف تسكتيني ؟؟ وانا قصدي والله طيب خلاص مايصير الا الخير ... وبعدين ياشيخ تمن كثييير تقول انا وابوك ماقصرنا فيك شوفي بالحفله اللي راحت انتي اكشخ وحده انتي وانتي انا شريتلك انا حطيتلك ومثلا اذا جبتلها شهادتي ابيها تفرح تقول مو انتي اللي المفروض تاخذ هديه المفروض انا انا اصحيك وافطرك ومدري ايش يعني ليه هذا المن وتقولي ليه انتي تعقيني ؟؟ كلامها ياشيخ يضايق حتى اخوي اللي اصغر مني ذاك اليوم قالي انتي تعالي صحيني ماتخلين امي تصحيني قلتله ليه قال تقول انت مراح تاخذ هديه واذا نجحت بتفوق هذا مو نجاحك انا اللي اصحيك وانا اللي اوقف على راسك عشان تذاكر واوفرلك الجو فقال اخوي ماابيها تقربلي عشان هذا مجهودي مو مجهودها .. يعني السالفه مو حساسيه مني حتى اخواني يحسون بهذا الاحساس ودايم تقولي انتي وقحه والله المره الثانيه ماعلي منك لاضربك عند اللي يسوى ومايسوى والله افضحك عند خوالك وعمامك والناس كلهم .. ليه انا اصلا وش سويت ؟؟ وبعض الاحيان انا بنام على 12 ولما ادخل غرفتي مايجيني النوم الا 4او5 او6 الفجر تجي 10 تصحيني ولما ماصحى تقول انتي نايمه الليل كله وانا انقهر اني مااقدر اقولها شي لاني لو قلتلها بتهاوش يعني في كل الحالتين بتهاوش واذا سويت شي قالتلي والله اعلم ابوك ولما تعلم ابوي تقول كلام زايد عني مو حقيقي وتخلي ابوي يزعل مني كثير ولما ابتسم في وجه احد من اخواني تقول لابوي اول مره تبتسم ولما اقول انا الغداء علي اليوم تقول اني اصلا ماوراك سنع ولاغداء زين ؟؟ تهاوشني تقول انتي ماتشتغلين انتي ماتسوين ماتطبخين ماتحركين شي في البيت انتي كسوله طيب كلامه ضايقني ماعدت اعرف وش اسوي هذا بس اللي صار اليوم لو بقول كل شي والله ماسكت انا اسفه طولت عليك ياشيخ بس الله يخليك ابي حل نصفه يكفي ابي حل بأسرع وقت انا انخطب وارفض يعز علي اطلع من البيت وانا وامي كذا كل يوم نجره بالمختصر هي طيبه ولكن تجيها حالات يعني مثلا توي اشوفها تضحك شوي القاها معصبه ومع انها متدينه وكل يوم تقراء البقره ياشيخ خلتني عصبيه ودايم مكشره ونفسيتي بخشمي وتسألني ليه كأنك مغصوبه كيف مااصير كذا وانا كل يوم اسمع كلام مو زين عني ؟؟ هي تفهم غلط تفسر كل حركاتي على كيفها تمن علي بشكل غير طبيعي حتى بصرف الفلوس تهددني دايما تزعل مني بسرعه وكأنها ماتصدق الزله تستتفه كل شي اسويه وتقول هذا ابو سنتين يقدر يسويها دايم محطمتني وكأني مااصلح اسوي ولا شي كرهتني بدراستي ماتسمعني اذا شكيت تقول ايه ايه بس خلاص اسكتي ماتسمع الا اللي يهمها بس ومع هذا كله اشوفها طيبه ولكن انا ابي حل نفسيتي تعقدت انا عصبيه مااسمع كلامها ولكني اتحسف واروح اعدل الموضوع وبالاخير هي تقولي انتي انانيه ماتهتمين غير فنفسك ولا تعطين ذرة اهتمام لاهلك وبيتك ومع اني والله ياشخ دايم افكر فيهم واي ارضيهم واسعدهم وانا من كلامها دايم نفسيتي شينه ومعصبه ودايم اتمنى ربي ياخذ عمري .... ياشيخ طلبتك عطني اهتمامك وحلللي مشكلتي لاتقولي اصبري وهذي امك وماعند الله خير والله ياشيخ كلامك على عيني وراسي لكني ابي طريقه اتعامل معها فيها لاني جربت كل الطرايق مانفعت حتى بعض الاحيان اسمعها تقولي حسبي الله عليك ياوقحه يا .. ويا ... ويا ... واطنش عشان مااتعب نفسيني لكن والله ابي حل في انتظارك بأقرب وقت ويعطيك الف اف عافيه وفي ميزان اعمالك الصالحه يارب